التصبيح بالياهل
w صباحك الصباحي والورد والتفاحي
wصباحك صباحين صباح الكحل في العين ...صباح يطرد الفقر .. صباح يطرد الدين(الدين=الديون) .. صباح الناس مرة صباحك عشر وفنتينصباحك من صباحين صباح الكحلة في العين .. صباحك من صباحين صباح النخلة العودة ولو فيها عذقين .. صباحك من صباحين صباح الصخلة السودة لو جابت تويسين ..
wصباح الخير قبل مايرفرف الطير والطير له جناحين والى وليدي نبا الخير
wصباحك السعادة زيارة علي و أولاده وكل يومٍ مضى من عمر وليدي زيادة
wصباحك لولو البحر مسباحك .. والبين مايندلك ولا يسمع صياحك
wيعمري من نام وقعد... والنوم في عيونه بعد
أغاني باسماء الوليدات
بابا "الأسم " تعال جيب ليها خلال .. من خلال الداليا .. "الأسم " يالغالية
زهرا:
زهرا زري امقنعة بالمشمري أبوها غايب السفر يبيع ويشتري
حسين :
هذا حسين نور العين .. يفرح لا شاف القرشين
أحمد أو أحمدوه :
أحمدوه دقاق الشلبة ... أحمدوه ماحد يغلبه ...أحمدوه أحرس ربه ... أحمدو وايد أحبه
حسن :
حسن حسن حسنسن راح البحر يتسنسن ..في مشيته يتفنن كلامه أحسن وأحسن
علي :
علوي شب "جب" اللبن راح لأمه مستجن .. علوي شب "جب" الحليبة علوي ماحد يجيبه ...
زينب :
زينب تجمع الحوي .. ضاعوا تراكيها .. تمبى تراكي ذهب .. وابوها يراشيها
أغاني الترقيص :
¤ ياغناتي هالولد يكبر ويعمر البلد ويعيش لأمه هالولد
¤ متى اشوفك ملتحي واشوف قدك واستحي واقول تغطوا جاكم "الأسم " ريال
¤ ارقصي ياراقصة فوبش ماناقصة ..طوله طول القدم .. زايد ماناقصة
¤ ارقصي يا رقاصة ابوش مقدم الغاصة يجيب لأمش لولو وإلى العدوة ارصاصة
¤ هلو هلو هلوها ... من الذهب ملوها .. سبعين حبشية تخدم في بيت ابوها
¤ تشيل ريول وتحط ريول حسافة ماعليها حيول
¤ صبري عليي بس شهر يا غناتي... وأعطيش ريالٍ غني ياغناتي ... سيد ولا عنده امبني ياغناتي
إذا وقف الياهل :
وقف وقف " الأسم " طال السقف " الأسم "
وقف وقف حيدة .. طال السقف بيده
متفرقات
§ ياسنور تت ماعندنا بت ماعندنا إلا " الأسم " اتصيح وتسكت
§ حبيبتي وريدش .. والعبدة تغسل أيدش .. حبيبتي واني امش ... اشق شبدي واضمش
§ إلا مايقول لش يعيني يعمى بالفنتيني .. يطلق أم أولاده ويكفر عليه الدينِ ..
إلا مايقول لش مرحبى ..لا عاد في بيته ربى .. ولا فرح بيوم عيد ومالبس فوب يديد
§ زانة زانة زانة والباقي تعرفوه ..
§ سطاحة بطاحة وكلاب البدو نباحة .. هذا للبابا .. هذا للماما .. هذا لديدة ..هذا للخالة .. هذا لرنيم وقال الفار دلوني بيت رنيموه ودوني ..
ولتنييم الياهل ..
نام هلولو عن الشـ "جـ"ـليب والعوعو .. نام هوّى عن الشليب والعوى ..
صلوات على النبي .. ياعين عنها جنبي ..صلوات اعلى محمد والعدو اعمى مصمد ..
صلوات اعلى النبي والسلام على علي نور الهدى يامحمد شمس الضحى ياعلي ..شمس الضحى اظلمت وردها المولى علي
وبس .. سالمين وسلموا سلمواعلى يداتكم ..
إذا مشى .. ولد سنه:
ياغناتي ود سنه يحمل بريق ومسخنه يروح يعيط في الطريق وين أبوي بحضنه...
هذي تأليف وحدة شكلها ما تحب زوجها هههه:
من طلع على أمه حاش العلم وضمه من طلع على عمه شاف العلم ولمه .. من طلع على خاله شاف العلم بقباله .. من طلع على ابوه ياشلاب(كلاب) الخندق اخذوه..
هذي لعبة باللأيدي تحسب بالأغنية والي تبقى بالأخير ..زي حاله مالة برتقاله شيني ميني رف..
حرارتي مرارتي .. سبع الطيور وجارتي .. وأمنا شُبيّره (كبيرة) صُغّيره.. من الشاط إلى البار على طريق المنزلة ... ياسليسلي دليني يابو العنب والتيني .. وان شان مادليتني زلعتك ملعتك بالسيف والسجيني ..جتنا بنية من قطر .. فيها زعازيع ومطر .. فيها صبيٌ غاوي انداوي يلعب على فيّ القمر وقطع السروالي ..
وفي كلمات كتبتيها في بعض الأضافات او غير شوي .. متى اشوفك ملتحي اشندس راسي واستحي .. متى اشوفك ريال (رجال) بين القبايل خيال .. واقول اتغطوا ريال(رجال) اكتب بالياء لأني سنابسية واحنا نتكلم ببعض الحروف بالياء ..؟؟ للمعلومية فقط ..
هذي على مرة الأبو : سروالي الخليجي خياطه الزين .. كل البنات تحنو على طرقين ما في إلا اني طرق واحد .. باروح لمرة أبوي تحنيني عشرة .. يامرة ابوي وجهش القوبعة .. قوبعه
..
والا عنده اي غناية على اليهال يجيبها هنيه يحطها .. هذاني استناكم والا ماييب ان شاء الله تطلع له ام الخضر و الليف ..
تحياتي لكم ..
مــحــبــكــــم ..
راوي الجرح .. ؟ ..
الرئيسية 
